Gabayo

Cali Cilmi Af-Yare

Mashiiqsi

Gabaygan wuxuu ka mid ahaa silsiladii Hurgumo wuxuuna abwaanku tiriyey 1979

isagoo xilligaa joogay magaalada Muqdisho.  Wuxuu ugu jawaabayey Khaliif

Sheekh Maxamuud oo ahaa ninkii bilaabay silsilada. Wuxuu yidhi Cali Cilmi Allaha

u raxmee:

    ·        In dhoweydba Miinleyda gabay, waanigaan marine

·        Waa taan ka maaliyey halkiyo, mooshinkii Guba e

·        Maantana haddaan lay mudmudin, uma muraadeene

·        Mufti shiikh ah madal laysu yimid, culimmo maageeran

·        Minhaajkiyo tuxfaha qiil haddii, laysu mari-waayo

·        Ma'wiga laga cabbiyo waa muqniga, inan ku laabtaaye

·        Nin malaasan iyo jaahil waa, marin habaabaane

·        Hadduu macangag yahay ruuxu waa, meesi kaa lumaye

·        Maandhow ma fiicnide waxaan, magane kuu sheegay

·        Maansooyinkaad tirisay iyo, gabayadaad miistay

·        Macnihiyo ujeeddada kolkaan, aad u kala miiray

·        Hadduu adiga kula miiggan yahay, maaha kaan rabaye

·        Murre iyo wuxuu ii dhadhamay, midho dhunkaaleede

·        Mullaax baan ka waayiyo waxaan, sii macaansado e

·        Dhegahaygu goortey maqleen, waan mashiiqsadaye

·        Geedkuba mankiyo ubaxa iyo, midho hadduu saaro

·        Oo uu magooleeyo indhuhu, milicsadaaniine

·        Hadduuse mudhuxsan yahay waa malluug, miiqan weligiise

·        Murtina lagama helo faallo aan, loo maqaan deyine

·        Miisaan culeysliyo kolkuu, waayo marinkiisa

·        Milgo waxaan lahayn iyo sidii, meehanaw noqoye

·        Murugo iyo ciil waa nin rag ah, meheraddiisiiye

·        Inkastoo masaartiyo warmaha, lagu maleegaayo

·        Ma cataabo geesiguye waa, mici-adaygaaye

·        Maraabaha nabsigu waa, sidii moodda galabeede

·        Masuubo iyo khayr wixii ku hela, Maaliggaa qoraye

·        Mulki iyo awood ma leh nin kale, waadse moogtahaye

·        Maqaadiirta Eebbahay haddaad, muran ka keeneyso

·        Oo aad moodday ruux kale inuu, maamullada  haysto

·        Muslinnimada aad sheegatiyo, magucu waa beene

·        Mar baad dunida miid iyo karuur, malab ka leeftaaye

·        Marna dacar khadhaadh iyo sun baa, laga magawshaaye

·        Mugdigiyo caddada waxa ka dhigay, waa masalo weyne

·        Mahad weeye Eebbahay wixii, aad ka mudataaye

·        Mar haddaadse ka iimaan xuntahay, meeriskiyo qaybta

·        Marinka aad ku joogtaaba waa, kii munaafaqa e

·        Afartaa sidii macallimada, miin ma ka higgaadshay

·        Majarihiisa kama leexiyee, muunad ma u sheegay

·        Afar kalena mayay soo curtiyo, mililiceygii dheh

·        War laas maax yar miileysi baa, loo mijiliyaaye

·        Nin waliba muggii kama heliyo, waa maroorsadaye

·        Gobannimada ma anaa iska leh, meerto sow maaha?

·        Muddo aan yareyn baa khalqigu, noo maddiiddimaye

·        Oo maydhaxdiyo dhuubka iyo, maarahow sidaye

·        Oo aan maroodi u ahaa, maato koriyaaye

·        Maantana ma liito ee adaa, mooye kuu ciyaye

·        Maldah iyo ibliis waalan baa, maanka kaa rogaye

·        Makaabkiyo dhistii igama dumin, maxashtu ii tiille

·        Maradaydii way saarantahay, muunadda lahayde

·        Igadhkii maqaarkiisa nacay, oo mid kale doonay

·        Maahmaahda gabaygaaga waa, lagu mataalaaye

·        Midigta iyo bidixdaadu waa, laba mataanoode,

·        Majeerteenka aad kicisay iyo, mililka aad qooshtay

·        Iyo nimanka aad madhiya tidhi, kalama maarmaane

·        Abaal waa  magdhow iyo inaad, maalin celisaaye

·        Iyaguba markaad haysateen, waa mintidayeene

·        Muruq bay ku daafacahayeen, waana loo marage

·        Ma aqaan ra'yiga foororaa, meel u kaa galaye

·        Mareexaanku kii kula dhashiyo, magaca sow maaha?

·        Maxamuud Saleebaan xumaan, uma midoobaane

·        Hadday qolo maraar yeelatoo, muusannaw kiciso

·        Adigoo maslaxad eegayaa, loo miyiriyaaye

·        Middidaad afeyneyso iyo, waxad maleegeyso

·        Haddaad labada meelood colaad, miiggan ku abuurto

·        Waxa adiga madhax kaaga noqon, waa i mari weydey!

·        Haddiise mooradduug iyo dhac iyo, mahadho lay geystey

·        Maqaawiir la soo xulay haddii, muxubbo loo laayey

·        Muswareenka adigaa dhigayoo, maahirtii dilaye

·        Muquunadii Rashiid loo diraye, malagtay sow ma ahid?

·        Maantana waxaad maagan tahay, waa midkii xigaye

·        Midhatirisku goormuu muhdiyow, kula macaanaaday?

·        Madiixiyo gabaygaagu waa, kaa muraadsadaye

·        Macnihii dawacadii haddaad, igu madaareyso

·        Miidlaha wankiyo goortii ay, mariso reerkaaga

·        Ooy maqasha kaa layso bay, kuu mashxaraddaaye

·        Magligayga jiifsaday haddaad, maad ka dhiganayso

·        Inkastoo magool aadan lahayn, muhasho ii qaaddo

·        Ma illaawin godobtaad qabto ee, maarsashaan ahaye

·        Maxaa Diini ii dhimay adaa, jebiyey mooskiiye?

·        Afartaa sidii macallimada, miin ma ka higgaadshay

·        Majarihiisa kama leexiyee, muunad ma u sheegay

·        Afar kalena mayay soo curtiyo, mililiceygii dheh

·        Mallayga iyo beeyada raggii, ad ugu maansootay

·        Siwaaqroonka xeebtiyo marsada, mooshinku is dhaafo

·        Muuse iyo Ismaaciilka Bari, kuma maqlaayaane

·        Iyagoo mareeg lagu xidhay oo, moora lagu ooday

·        Musbaaxdii kacaanku u shiday bay, mahadinnaayaane

·        Mas qaniinyo kama daalo iyo, micida dhiigeeye

·        Moxog nimaad u diirtiyo marduuf, midad ku ceebeyso

·        Manaabaysay aadmiga kurtii, meel u joogaba e

·        Raggii sharafta weyn kaa mudnaa, mooddey cadawyo e

·        Gobannimo Isaaq muujiyoo, waa markab adage

·        Maandeeq raggii dhaliyey iyo, miiddu waayaga e

·        Muxubbiga kalgacalkaan u qabo, waa mid igu dheere

·        Ingiriiska nimankii miraye, moodharrada saaray

·        Mufsadka iyo Gaalada raggii, mariyey gaalleefta

·        Maqruun kuma sifeyseen haddaan, maanku kaa tegine

·        Maskaxdii nin yari cayda way, saga muraadaaye

·        Ogaadeenka aad maagtay iyo, midabtakoorkaaga

·        Ma oggoli Dhulbahantaa ku diley, oo ku mowtiyaye

·        Mutukhnaanta iyo waa nebcahay, keli maqiiqnoowe

·        Inkastoo milxiis iyo nin xumi, nagu dhex meeraayo

·        Muslimka haygu dirin wadajirkaa, lagu macayshaaye

·        Masallaha dhulkiyo ciiddu waa, mahuradaadiiye

·        Meermeerka iyo guuldarrada, kugu madoobaatay

·        Waxba muujinmeyside cidlaad, malandahaysaaye

·        Mar haddaad Amxaar miridhle iyo, mooriflaha raacday

·        Mingistiyo dirkiisaad tahaye, hay maxooliyine,

·        Magacaa ba'yaye ma adigaa, ila Majeerteen ah?

Salaan Carabeey

Waar tolow colka jooja

1.      Baashow daliil gabay ma jiro, nin igu doorshaaye

2.   Halka dooyna laga naadiyaan, duunka weriyaaye

3.   Dux markaan ka garan waayey, baan daayey waayahane

4.   Kol baan diririyaa sidi cirkoo, da’ kaliilaaye

5.   Xaluun baan digiriyey sidii, wadaad diin u haajiraye

6.   Dabuubtaan la yeedhana Rabbaa, duusha weligeede

7.   Waa daabac aan go’in midkaan, duco bilaabaaye

8.   Daadxoorta iyo mawjaddaan, kala dabbaalaayo

9.   Dacartaan wadnuhu hayn karayn, daari feedhaha e

10. Waa daafi yaridii horee, aan idin deeqsiiyo

11. Dibna waxaan u idhi xaajo, waa dux iyo hawraare

12. Reer Faaraxeer kala durkee, kala duddeynaaya

13. Aan uu Ducaale iyo Seed, ha igu diideene

14. Duugeeda belo wuu helaa, nin u dadaalaaye

15. Nimanyahow tolnimo waa dugsiye, dunida jeedaasha

16. Dunjiga Nuux Ismaaciil tashiga, daaha laga saarye

17. Deegaa Reer Axmedi wiilashii, timirta diiqaayey

18. Xasandabadna reer Jaamicii, kala dabayl raacye

19. Aroos dama damaashaad iyo naas, daawashada geedka

20. Dibna hadal ka yimid baa cag-geel, loogu daw galaye

21. Deelqaaf fagaaraa Iblays, kugu dukhuulaaye

22. Nimanyahow tolnimo waa dugsiye, dunida jeedaasha

23. Dalaalkuu laqwiyey Reer Shirdoon, danafsigii eedye

24. Dalanbaabigii Dhamal wuxuu damac, lahaa leefye

25. Bah-Godabiirsi danab baa ku dhacay, dimishigii goofe

26. Nin darraad lumiyo naagihii, dulube ooyaaye

27. Reer Geeddigii dibada maray, daadi amarkiiye

28. Nimanyhaow tolnimo waa dugsiye, dunida jeedaasha

29. Reer Sugulle dakhar wiil yar baw, sidey dubaaqdiiye

30. Waa taa degmada laysku furey, dabadi looyaane

31. Dulmi hadduu qabsaday Eebaheen, daayinaa jire e

32. Dubaaqii qabriga hawgu turo, dabaqi naareede

33. Dummadii Xirsuu saaran yahay, Dubur raggii yiile

34. Doolaabadii boqor hadduu, damacsanaa weeye

35. Dabar qaaday Reer Diiriyihi, damaca waallaaye

36. Duudsuu ku dhacay ina Ammaan, dib-u-heshiintiiye

37. Nimanyahow tolnimo waa dugsiye, dunida jeedaashe

38. Reer Cali-garaa isugu darraa, dil iyo qoomaale

39. Dekenidii qabaalkii raggii, dumiyey qoomeeye

40. Waa dawri Buuhoodlahey, dir u lahaayeene

41. Waayadanba dabataa fadhiday, daalinoo col ehe

42. Durba waranka waysugu dhaqsaday, dooxanaa madhane

43. Ma degdego nin dirirtii ogaa, dooxadii Garabe

44. Ku dibsade Daboolan iyo Cadey, danabadii yiile

45. Dabkuu Aadan shidey Ina Gallaydh, durugsigii waaye

46. Danbarkeeda dhaxal xaajaduu, doortay Reer Gorode

47. Nin dardaarankii Cumar hayaa, mudanihiis daaye

48. Nimanyahow tolnimo waa dugsiye, dunida jeedaashe

49. Ararsame dulmaa kala qabsaday, dirirti caymeede

50. Daaroodba maqal xaajadii, daahirka ahayde

51. Dubku hadduu ku nixi Reer Wacays, deleb shixii raacye

52. Tuka lagama dadin wiilaashii, wada daboollaaye

53. Ma duugine sidii bay lafuhu, dibad u yaalliine

54. Daris waxaa aqbalay reerihii, dawladda ahaaye

55. Markuu sheekh cilmiga daakiraa, fiqi duceeyaaye

56. Diinta wadaad kama aflaxo, xaqa ka doodaaye

57. Koley deeradiyo cawsha tahay, doqontu waa quuse

58. Iyana waa isdoontaan kolkay, kala dibboodaane

59. Duunyadatan kama liidataan, daaqi geedaha e

60. Nimanyahow tolnimo waa dugsiye, dunida jeedaashe

61. Dayax soo iftiimiyo qofkaad, dahabka moodeysay

62. Wax Dallaayad laysugu rogmaday, darabka saarraaye

63. Jeerow dabriyo lays markaday, dooyo iyo weerar

64. Cali diid halkaan maalintaa, dawga ku ahayne

65. Daaqiyada mawdkii dhadhami, wuu duraansadaye

66. Bah Idiris ma dayin Reer Jibriil, digasho loolkiiye

67. Ninna Faarax kama daawo gelin, xaalki loo dilaye

68. Dugaag baa hirqaday feedhihii, darabta weynaaye

69. Col dareeray duukiyo lalabo, dirayo sheydaanku

70. Danabaysiga nimankii badnaa, duraha jiilaalka

71. Dawriyaha Reer Muusihii, dad u itaal sheegtay

72. Daleelii wareeg baa la dhigay, duco qabeenkiiye

73. Nimanyahow tolnimo waa dugsiye, duinda jeedaasha

74. La dalleensay Nuux Maxamedkii, idinku deyrraaye

75. Daaraha la ridey sura madow, dumarka ooyaayey

76. Dugayeyda naagaha hablaha, dibadda meeraaya

77. Haddaan dayey dayaca Reer Barrow, daran ammuurtaase

78. Warsow kama diqootaan ilmada, dibiqle guudkooda

79. Dalki waxa xukuma Reer Warsame, dixida weynaaye

80. Imankay degmada soo fureen, daranti tiigeete

81. Duddo reerka loo dhigay haddii, Dagel la waaheelo

82. Duleedkaa mus laga joojiyaa, dibadda dhowree e

83. Ragna mudanihiisa saw dugsiya, dah iyo gaashaane

84. Meeshii dalleenaa libaax, degi ka eegtaaye

85. Magacna waa diboo dhalashadii, loo demeli waaye

86. Ayaan idin diqdiqin waano, aan durina aafeyne

87. Danba kama leh Reer Faaraxaan, docoginnaayaaye

88. Wax balaayo lagu diimiyaa, duul ku waajibay

89. Colkan Habar-Jeclada loo dudi, daw kalow furane

90. Allow yaa caruurahan durdurin, kala dillaameeye